Skúlin

Føroya Fólkaháskúli varð stovnaður í Føgrulíð í 1899 av Rasmusi Rasmussen og Símuni av Skarði. Tankin var, at her kundi ein hugdýpa seg í samljóð við náttúruna, langt fá óljóði og vasan frá fólki. Í 1909 varð skúlin fluttur til Hornabø í Havn, har hann enn er staddur. Skúlin liggur í einum grønum øki, og her geva vit okkum enn frið og góðar stundir at læra í einum tryggum kreativum umhvørvi.

Nógvar lærugreinar hava verið á Háskúlanum ígjøgnum tíðirnar, og í dag verður undirvíst í høvuðslærugreinunum; myndlist, framførslulist og mentan & umhvørvi.

Á heysti hava vit eitt fimm mánaðar langt skeið, har ið næmingarnir búgva á skúlanum. Leypandi bjóða vit eisini styttri skeið í vikuskiftum og onkur kvøldskeið fyri onnur áhugað.

Føroya Fólkaháskúli er sjálvsognarstovnur undir Barna- og útbúgvingarmálaráðnum.

Hvat er ein háskúli?

Ein háskúli er ein vistarhaldsskúla, har tú býrt og hevur undirvísing í lærugreinum, ið hevur tín áhuga. Ein háskúli er fyri øll, og krevur ongar forkunnleikar. Á Háskúlanum eru ongar próvtøkur, og sostatt eru háskúlamánaðirnir ætlaðir sum eitt andarúm frá strembanini eftir úrsliti. Fimm mánaðir, har tú kanst fordjúpa teg og vaksa sum menniskja í góðum felagsskapi við øðrum. Bólkurin av næmingum hevur stóra ávirkan á undirvísingina, sum tekur form í samstarvi við læraran.

Tiltøk og skeið

SÍ MEIRA