- Hetta tiltak er liðugt.
Summarskeið: Lindy Hop – víðkað grundskeið
Eftir væleydnað lindy hop skeið við Lív Reynheim og Biritu á Mýrini, bjóðar háskúlin tær hervið á summarskeið. Hetta er eitt tilboð, ið er ætlað fyrrverandi luttakarum á skeiðum, har eftirmetingarskjøl vísa, at áhugi er fyri framhaldskeiði. Talan er um trý mikukvøld á rað: 5., 12. og 19. juni. Tvey tey fyrstu kvøldini er vanlig undirvísing, og triðja kvøldið fara vit ein felags gongutúr – sí frágreiðing niðanfyri.
Skeiðslýsing
Mikukvøldini 5. og 12. juni skrúva vit upp fyri eykenda góða jazztónleikinum. Vit fara at uppfríska grundstevini og leggja dent á at fáa hesi at sita. Harumframt leggja vit onkrar venjingar afturat, sum tit eftirfylgjandi kunnu reypa tykkum av.
Triðja og seinasta kvøldið, 19. juni, brúka vit í góðum selskapi við luttakar á øðrum skeiðum á háskúlanum. Talan er um afturvendandi luttakarar á glasskeiði, tekning og raddarskeiði. Sí meiri kunning um hetta serstaka kvøldið niðanfyri.
Avmarkað pláss verður á skeiðinum, men um tit ynskja at bjóða partnara ella vini við, so ber hetta eisini til. Vit endurtaka grundstevini, sum vit lærdu á undanfarna skeiðinum, men víðka um tekniskar førleikar og musikalitetin hjá tí einstaka.
Art Hike
Triðja mikukvøldið, 19. juni, verður eitt serligt kvøld, har allir luttakararnir á ymisku skeiðunum, fara ein felags gongutúr, ein sokallaðan Art Hike – ein listaligan gongutúr. Áður hava Jón Sonni Jensen og Guðrið Poulsen skipað fyri líknandi gongutúrum kring landið, og fært tú nú høvi at luttaka á einum slíkum.
Tað sum sermerkir ein Art Hike gongutúr, er, at dentur verður lagdur á at koma at kenna náttúruna á ein øðrvísi hátt.
Hvør luttakari fær ein toyposa við einum góðum matpakka, vatnfløsku og eini sitipútu. Í posanum verða eisini aðrir forvitnisligir lutir, sum vit brúka til aktitivitetir, ið læraranir á Háskúlanum skipa fyri.
Skrá:
5. og 12. juni
- kl. 17.00-18.30: Undirvísing
- kl. 18.30-19.15: Matarsteðgur
- kl.19.15-21.30: Undirvísing
19. juni
- kl. 17.00-21.30: Art Hike
Prísur: 750 kr.
Avmarkað pláss!